Edited by टीम मटा ऑनलाइन | महाराष्ट्र टाइम्स.कॉम | Updated: 18 Nov 2023, 11:49 am
Subscribe
सर्वसामान्य खातेदाराकडून घेतलेल्या कर्जाचा एखादा जरी हप्ता चुकला किंवा थकला, तरी या बँका तत्परतेने दंड आकारतात. या बाबतीत सरकारी बँकांचा तर अगदी वाईट अनुभव सर्वांनाच येत आहे.
एक डिजिटल (घोड)चूक
सरकारी क्षेत्रातील युको बँकेच्या खातेदारांच्या खात्यात एकूण ८२० कोटी रुपये जमा झाल्यामुळे बँकिंग जगतात अत्याधुनिक पेमेंट प्रणालीची पुरती नाचक्की झाली. हे सर्व पैसे तात्काळ पेमेंट सेवेच्या म्हणजेच इमिजिएट पेमेंट सर्व्हिसच्या (आयएमपीएस) माध्यमातून हस्तातंरित झाले. सुरुवातील हे पैसे खातेदारांच्या खात्यात युको बँकेकडूनच हस्तांतरित केले गेल्याचे वृत्त पसरले. मात्र बँकेने याची शहानिशा केल्यावर हा सगळाच प्रकार याहूनही गुंतागुंतीचा आणि धोकादायक असल्याचे स्पष्ट झाले. आयएमपीएस प्रणाली ही रकमेची अदायगी तात्काळ करता यावी, यासाठी १२ वर्षांपूर्वी सुरू झाली. आंतरबँक इलेक्ट्रॉनिक निधी हस्तांतर करता यावेत, यासाठी ही प्रणाली आली आणि ती अल्पावधीतच लोकप्रिय झाली. नॅशनल पेमेंट्स कॉर्पोरेशन ऑफ इंडिया (एनपीसीआय) ही संस्था आयएमपीएसचे व्यवस्थापन करते. या आयएमपीएस प्रणालीतून वेगळ्याच बँकांतील पेमेंट व्यवहारांतर्गत पैशांचे हस्तांतरण युको बँकेच्या खात्यांतून केले गेले. एनपीसीआयकडून आयएमपीएसच्या व्यवस्थापनात ढिसाळपणा झाल्याचा आरोप युको बँकेने केला आहे. सुरुवातीला प्रणाली हॅक केली गेली असावी किंवा प्रणालीत तांत्रिक दोष निर्माण झाला असावा, असे बँकेला वाटले. मात्र, ही चूक एनपीसीआयची असल्याचे स्पष्ट झाले. युको बँकेने या ८२० कोटींपैकी ६४९ कोटी रुपये खात्यांतून काढून घेतले. बँकेने याची गंभीर दखल घेत कोलकाता पोलिसात एफआयआर दाखल केला. बँकिंगच्या डिजिटायझेशनवर सध्या भर दिला जात आहे. असे असताना असे गैरप्रकार बँकिंग व्यवसायाला निश्चितच शोभणारे नाहीत. यात खातेदारांना झालेला मनस्ताप विनाकारण होता. यात युको तसेच अन्य बँकांच्या खातेदारांची काहीच चूक नव्हती. युको बँकेने खातेदारांच्या खात्यांत चुकून जमा झालेली ही रक्कम काढून घेतली, त्यावेळी या खातेदारांची मनस्थिती काय झाली असेल, याची कल्पना केलेली बरी. सर्वसामान्य खातेदाराकडून घेतलेल्या कर्जाचा एखादा जरी हप्ता चुकला किंवा थकला, तरी या बँका तत्परतेने दंड आकारतात. या बाबतीत सरकारी बँकांचा तर अगदी वाईट अनुभव सर्वांनाच येत आहे. अशा वेळी बँकेकडून झालेल्या या चुकीची जबाबदारी संबंधित बँक घेणार का? ही जबाबदारी सध्या तरी बँकेने आयएमपीएसचे व्यवस्थापन करणाऱ्या एनपीसीआयवर टाकून याची सीबीआय चौकशी व्हावी, अशी मागणी केली आहे. या आतील गोष्टींची कल्पना फारशी नसलेला सामान्य खातेदार मात्र यामुळे पुरता भांबावून गेला आहे. त्याला वाली कोण, हा प्रश्न उरतोच.
टीम मटा ऑनलाइन यांच्याविषयी
टीम मटा ऑनलाइन Digital Content Producer
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज
aniltikotekar4sme.com 